2.98Kpregleda
Ako ste mislili da je BMW uvek bio luksuzan proizvođač sa paletom punom skupih modela sa sportskim performansama, prevarili ste se.
Prije nego sto je postao globalno priznat, BMW – ovu gamu su činili i mali, bukvalno, mikro automobili koji su mu pomogli da preživi teške poslijeratne godine … Ako se zna, da je BMW iz rata praktično uništen, bez čitavih postrojenja i bez kupaca, panika koja je zahvatila upravu kompanije je bila potpuno razumljiva. Naime, većina fabričkih hala ostala je iza “gvozdene zavjese“ dok je samo dio namijenjen proizvodnju motocikala bio u funkciji. U takvim uslovima, BMW je pokušao da pokrene proizvodnju automobila ali je to uradio u pogrešnom pravcu.
Modeli koji su ugledali svjetlost dana pod čuvenim plavo-bijelim znakom su bili luksuzni i preskupi automobili, nedostižni poslijeratnim kupcima. Iako lijepi i kvalitetni, BMW 501 sedan, 503 coupe i 507 roadster, su bili proizvedeni u jako malom broju primjeraka, što fabrici nije donijelo dovoljno novca da preživi na tržištu. Suočivši se sa bezizlaznom situacijom i neprijatnom blizinom bankrota, uprava BMWa je morala da smisli radikalno rješenje. U isto vrijeme, jedno 1000 kilometara južnije od Minhena, italijanska fabrika ISO rashladnih uređaja i metalne galanterije, je napravila model Isetta, mikro automobil za dva putnika, nešto prtljaga i sa motorom i točkovima od skutera.
Italija, kao domovina malih gradskih automobila, odlično je prihvatila novog mališana koji se pokazao odličan za gradske uslove, ali ništa više od toga, jer bi bilo kakav ozbiljniji put loše djelovao na putnike zbog slabog komfora i nikakve udobnosti. Prodaja Isette zadovoljavajuće krenula po cijeloj Evropi, i taj uspjeh je privukao pažnju BMWa koji je odlučio da otkupi licencu i započne proizvodnju ovog autića u Njemačkoj. Ipak, njemački inžinjerski ponos, nije dozvoljavao BMW-u da samo “prekopira“ Isettu, nego su odlučili da je mehanički i dizajnerski unaprijede.
Za početak, motor je zamijenjen, BMW ovim agregatom iz motorcikla, zapremine 250 ccm sa 12 ks pri 5,800 obrtaja u minuti, montiran je četvorostepeni mjenjač, a snaga se prenosila na zadnja dva točka, preko gumenih kaiševa. Dizajnerski, farovi su izdvojeni od karoserije, a BMW-ov logo je montiran ispod vjetrobrana. Inače, taj logo je bio daleko manjih dimenzija nego kod ostalih modela, kao da se BMW stidio ovog simpatičnog automobila. Iako se promjene mogu činiti površne, Njemci su u stvari potpuno promijenili Isettu, tako da ova dva automobila samo liče, a realno, nemaju ni jedan zajednički dio.
U svakom slučaju, premijera BMW Isette je bila 1955 godine, pred zapanjenom, ali i zaintrigiranom publikom. Zapanjenom, jer tako nešto niko nije očekivao od BMW-a, a zaintrigiranom jer je BMW Isetta, predstavljala mikro automobil potpuno nove koncepcije. Tržište je odmah odlično reagovalo na nov model i u roku od 8 mjeseci preko 10000 narudžbina je stiglo na adresu fabrike. Cijena od ispod 1000 tadašnjih Njemačkih maraka je samo pomogla, a fabrika je garantovala 85 km/h maksimalne brzine dok je prema zakonu, Isettu bilo moguće voziti i sa dozvolom za motorcikl.
Već sledeće godine, 1956., Isetta dobija malo veći motor (300 ccm sa 13 ks) koji je napravljen tako što su postojećem agregatu povećani hod i prečnik klipa. Maksimalna brzina ostaje ista, a popularnost raste, dok BMW počinje da izvozi Isette i u ostale zemlje. U to vrijeme, u salone BMW su dolazili samo dvije kategorije ljudi, oni bogati, dovoljno situirani da plate skupe limuzine serije 501 ili oni koji bi željeli da voze automobil, a mogli su samo da priušte mikro vozilo kao Isetta. Zbog toga je tih godina BMW pokrivao samo početak i kraj ponude automobila.
Iste godine, Njemačka uvodi obavezu prave vozačke dozvole za kupce Isette, jer ih je bilo dosta na ulicama. Ohrabren uspjehom ovog automobila, BMW otvara filijalu u Engleskoj, gdje se Isetta počela proizvoditi 1957. Popularnosti ovog modela doprinosi i energetska kriza sa kraja 50tih i činjenica da ovi automobili nisu bili veliki potrošači goriva. Želja da se ova koncepcija razvije, natjerala je BMW 1958. godine, da predstavi Isettu 600, model koji je imao još dva sjedišta i konvencionalnu zadnju osovinu radi boljih voznih svojstava. Motor je raspolagao sa 600 ccm i 20 ks, a maksimalna brzina je povećana na 103 km/h.
Ovaj model je bio najozbiljnija Isetta u smislu ponašanja na putu i jedina koja je mogla da poveze više od dva putnika. Ipak, početkom 60tih, BMW je odlučio da mu Isetta kvari imidž kao i da je uradila ono zbog čega je stvorena, a to je da stvori profit i omogući fabrici da opstane. Na negodovanje publike koja je zavoljela ovaj mali auto velikog šarma, objavljen je prekid proizvodnje u avgustu 1962. Nakon 130,000 primjeraka napravljenih u Nemačkoj i 30,000 u Velikoj Britaniji, Isetta je otišla u istoriju kao najuspješniji mikro automobil na svijetu. BMW je izbacio model 700 koji je, i pored malog motora, bio ozbiljan auto i nije bio pravi naslednik Isette.
Ipak, Isetta se nije sklonila sa ulica i u velikim Evropskim gradovima je moguće i dalje vidjeti Isette kako se voze u gužvama na velikim bulevarima. BMW je zahvaljujući uspjehu ovog malog automobila, izgradio imperiju koja se danas ne bi postojala da nije bilo Isette. Ne samo što je ovaj autić spasao jednu čuvenu marku nego je postao uzor za drugu, pa su tako konstruktori Smarta, otvoreno priznali da im je najveći uzor u radu bila baš Isetta. Titula “invalidski auto“ koju je Isetta dobijala na nekim tržištima je potpuno nezaslužena jer auto nikada nije bio namijenjen prvenstveno toj grupaciji ljudi.
pmlautomobili.com
Dodaj komentar
